อจฺฉริยํ ภนฺเต นาคเสน ตาวตกํ มยํ ปญฺหํ อปุจฺฉิมฺหา ตํ ตฺวํ อุปเมหิ
การเณหิ วิภาเวนฺโน อมตมธุรํ สวนูปคํ อกาสิ ฯ ยถา ภนฺเต สุกุสโล สูโท วา
สูทนฺเตวาสี วา ตาวตกํ มํสํ ลภิตฺวา นานาวิเธหิ สมฺภาเรหิ สมฺปาเทตฺวา ราชูปโภคํ
กโรติ เอวเมว โข ภนฺเต นาคเสน ตาวตกํ มยํ ปญฺหํ อปุจฺฉิมฺหา ตํ ตฺวํ อุปเมหิ
การเณหิ วิภาเวตฺวา อมตมธุรํ สวนูปคํ อกาสีติ ฯ

สมณทุสฺสีลคิหิทุสฺสีลปญฺโห จตุตฺโถ ฯ

ภนฺเต นาคเสน อิทํ อุทกํ อคฺคิมฺหํ ตปปมานํ ปิปิทายติ ปฏิปิทายติ สทฺทายติ
พหุวิธํ กึ นุ โข ภนฺเต นาคเสน อุทกํ ชีวติ กีฬมานํ สทฺทายติ อุทาหุ อญฺเญหิ
ปฏิปีฬิตํ สทฺทายตีติ ฯ น หิ มหาราช อุทกํ ชีวติ นตฺถิ อุทเก ชีโว วา สตฺโต
วา อปิจ มหาราช อคฺคิสนฺตาปเวคสฺส มหนฺตตาย อุทกํ ปิปิทายติ ปฏิปิทายติ สทฺทายติ
พหุวิธนฺติ ฯ ภนฺเต นาคเสน อิเธกจฺเจ ติตฺถิยา อุทกํ ชีวตีติ สีตูทกํ ปฏิกฺขิปิตฺวา
อุทกํ ตาเปตฺวา เวกปฺปิตาย เวกติกํ ปริภุญฺชนฺติ เต ตุมฺเห ครหนฺติ ปริภวนฺติ เอกินฺทฺริยํ
สมณา สกฺยปุตฺติยา ชีวํ วิเหเฐนฺตีติ ฯ ตํ เตสํ ครหํ ปริภวํ วิโนเทหิ อปเนหิ
วิชเฏหีติ ฯ น หิ มหาราช อุทกํ ชีวติ นตฺถิ มหาราช อุทเก ชีโว วา สตฺโต
วา อปิจ มหาราช อคฺคิสนฺตาปเวคสฺส มหนฺตตาย อทุกํ ปิปิทายติ ปฏิปิทายติ สทฺทายติ
พหุวิธํ ฯ ยถา มหาราช อุทกํ โสพฺภสรสริตทหตฬากกนฺทรปทรอุทปานนินฺนโปกฺขรณีคตํ
วาตาตปเวคสฺส มหนฺตตาย ปริยาทิยติ ปริกฺขยํ คจฺฉติ อปิ นุ ตตฺถ อุทกํ ปิปิทายติ
ปฏิปิทายติ สทฺทายติ พหุวิธนฺติ ฯ น หิ ภนฺเตติ ฯ ยทิ มหาราช อุทกํ ชีเวยฺย
ตตฺถาปิ อุทกํ สทฺทาเยยฺย ฯ อิมินา มหาราช การเณน ชานาหิ นตฺถิ อุทเก ชีโว
วา สตฺโต วา อคฺคิสนฺตาปเวคสฺส มหนฺตตาย อุทกํ ปิปิทายติ ปฏิปิทายติ สทฺทายติ
พหุวิธนฺติ ฯ
อปรมฺปิ มหาราช อุตฺตรึ การณํ สุโณหิ นตฺถิ อุทเก ชีโว วา สตฺโต
วา อคฺคิสนฺตาปเวคสฺส มหนฺตตาย อุทกํ สทฺทายตีติ ฯ ยถา ปน มหาราช อุทกํ
ตณฺฑุเลหิ สมฺมิสฺสิตํ ภาชนคตํ โหติ ปิหิตํ อุทฺธเน อฏฺฐปิตํ อปิ นุ ตตฺถ อุทกํ
สทฺทายตีติ ฯ น หิ ภนฺเต อจลํ โหติ สนฺตสนฺตนฺติ ฯ ตํเยว ปน มหาราช อุทกํ
ภาชนคตํ อคฺคึ ชาเลตฺวา อุทฺธเน ฐปิตํ โหติ อปิ นุ ตตฺถ อุทกํ อจลํ โหติ

สนฺตสนฺตนฺติ ฯ น หิ ภนฺเต จลติ ขุพฺภติ ลุฬติ อาวิฬติ อูมิชาตํ โหติ อุทฺธมโธ
ทิสาวิทิสํ คจฺฉติ อุคฺฆรติ ปคฺฆรติ เผณุมาสิ โหตีติ ฯ กิสฺส ปน ตํ มหาราช ปากติกํ
อุทกํ น จลติ สนฺตสนฺตํ โหติ กิสฺส ปน อคฺคิคตํ จลติ ขุพฺภติ ลุฬติ อาวิฬติ
อูมิชาตํ โหติ อุทฺธมโธ ทิสาวิทิสํ คจฺฉติ เผณุมาสิ โหตีติ ฯ ปากติกํ ภนฺเต อุทกํ
น จลติ อคฺคิคตํ ปน อุทกํ อคฺคิสนฺตาปเวคสฺส มหนฺตตาย ปิปิทายติ ปฏิปิทายติ
สทฺทายติ พหุวิธนฺติ ฯ อิมินาปิ มหาราช การเณน ชานาหิ นตฺถิ อุทเก ชีโว วา
สตฺโต วา อคฺคิสนฺตาปเวคสฺส มหนฺตตาย อุทกํ สทฺทายตีติ ฯ
อปรมฺปิ มหาราช อุตฺตรึ กาณํ สุโณหิ นตฺถิ อุทเก ชีโว วา สตฺโต วา
อคฺคิสนฺตาปเวคสฺส มหนฺตตาย อุทกํ สทฺทายตีติ ฯ โหติ ตํ มหาราช อุทกํ ฆเร ฆเร
อุทกวารกคตํ ปิหิตนฺติ ฯ อาม ภนฺเตติ ฯ อปิ นุ ตํ มหาราช อุทกํ จลติ ขุพฺภติ
ลุฬติ อาวิฬติ อูมิชาตํ โหติ อุทฺธมโธ ทิสาวิทิสํ คจฺฉติ อุคฺฆรติ ปคฺฆรติ เผณุมาสิ
โหตีติ ฯ น หิ ภนฺเต อจลํ ตํ โหติ ปากติกํ อุทกวารกคตํ อุทกนฺติ ฯ สุตปุพฺพํ
ปน ตยา มหาราช มหาสมุทฺเท อุทกํ จลติ ขุพฺภติ ลูฬติ อาวิฬติ อุมิชาตํ โหติ
อุทฺธมโธ ทิสาวิทิสํ คจฺฉติ อุคฺฆรติ ปคฺฆรติ เผณุมาสิ โหติ อุสฺสกฺกิตฺวา อุสฺสกฺกิตฺวา
เวลาย ปหรติ สทฺทายติ พหุวิธนฺติ ฯ อาม ภนฺเต สุตปุพฺพํ เอตํ มยา ทิฏฺฐปุพฺพญฺจ
มหาสมุทฺเท อุทกํ หตฺถสตมฺปิ เทฺวปิ หตฺถสตานิ คคเณ อุสฺสกฺกตีติ ฯ กิสฺส มหาราช
อุทกวารกคตํ อุทกํ น จลติ น สทฺทายติ กิสฺส ปน มหาราช มหาสมุทฺเท จลติ
สทฺทายตีติ ฯ วาตเวคสฺส มหนฺตตาย ภนฺเต มหารสมุทฺเท อุทกํ จลติ สทฺทายติ
อุทกวารกคตํ อุทกํ อฆฏฺฏิตํ เกหิจิ น จลติ น สทฺทายตีติ ฯ ยถา มหาราช วาตเวคสฺส
มหนฺตตาย มหาสมุทฺเท อุทกํ จลติ สทฺทายติ เอวเมว อคฺคิสนฺตาปเวคสฺส มหนฺตตาย
อุทกํ สทฺทายติ ฯ
นนุ มหาราช เภริโปกฺขรํ สุกฺขํ สุกฺเขน โคจมฺเมน โอนทฺธนฺตีติ ฯ อาม
ภนฺเตติ ฯ อปิ นุ โข มหาราช เภริยา ชีโว วา สตฺโต วา อตฺถีติ ฯ น หิ
ภนฺเตติ ฯ กิสฺส ปน มหาราช เภริ สทฺทายตีติ ฯ อิตฺถิยา ภนฺเต ปุริสสฺส วา
ตชฺเชน วายาเมนาติ ฯ ยถา มหาราช อิตฺถิยา วา ปุริสสฺส วา ตชฺเชน วายาเมน
เภริ สทฺทายติ เอวเมว อคฺคิสนฺตาปเวคสฺส มหนฺตตาย อุทกํ สทฺทายติ ฯ อิมินาปิ
มหาราช การเณน ชานาหิ นตฺถิ อุทเก ชีโว วา สตฺโต วา อคฺคิสนฺตาปเวคสฺส มหนฺตตาย

อุทกํ สทฺทายตีติ ฯ
มยฺหมฺปิ ตาว มหาราช ตว ปุจฺฉิตพฺพํ อตฺถิ เอวเมโส ปญฺโห สุวินิจฺฉิโต
โหติ ฯ กินฺนุ โข มหาราช สพฺเพหิปิ ภาชเนหิ อุทกํ ตปฺปมานํ สทฺทายติ อุทาหุ
เอกจฺเจหิเยว ภาชเนหิ ตปฺปมานํ สทฺทายตีติ ฯ หิ ภนฺเต สพฺเพหิปิ ภาชเนหิ
อุทกํ ตปฺปมาณํ สทฺทายติ เอกจฺเจหิเยว ภาชเนหิ อุทกํ ตปฺปมานํ สทฺทายตีติ ฯ
เตนหิ มหาราช ชหิโตสิ สกสมยํ ปจฺจาคโตสิ มม วิสยํ นตฺถิ อุทเก ชีโว วา สตฺโต
วา ฯ ยทิ มหาราช สพฺเพหิปิ ภาชเนหิ อุทกํ ตปฺปมานํ สทฺทาเยยฺย ยุตฺตมิทํ อทุกํ
ชีวตีติ วุตฺตํ ฯ น หิ มหาราช อุทกํ ทฺวยํ โหติ ยํ สทฺทายติ ตํ ชีวติ ยํ
น สทฺทายติ ตํ น ชีวตีติ ฯ ยทิ มหาราช อุทกํ ชีเวยฺย มหนฺตานํ หตฺถินาคานํ
อุสฺสุกฺกายานํ ปภินฺนานํ โสณฺฑาย อุสฺสิญฺจิตฺวา มุเข ปกฺขิปิตฺวา กุจฺฉึ ปเวเสนฺตานํ
ตมฺปิ อุทกํ เตสํ ทนฺตนฺตเร ปีฬิยมานํ สทฺทาเยยฺย ฯ กตฺถสติกา มหานาวา
ครุกา ภาริกา อเนกสตสหฺสสภารปริปูรา มหาสมุทฺเท วิจรนฺติ ตาหิ ปีฬิยมานํ อุทกํ
สทฺทาเยยฺย ฯ มหติมหนฺตาปิ มจฺฉา อเนกสตโยชนิกกายา ติมี ติมิงฺคลา ติมิรปิงฺคลา
อพฺภนฺตเร นิมุคฺคา มหาสมุทฺเท นิวาสนตาย ปฏิวสนฺตา มหาอุทกธารา อาจมนฺติ ธมนฺติ
จ เตสมฺปิ ตํ ทนฺตนฺตเรปิ อุทรนฺตเรปิ ปีฬิยมานํ อทุกํ สทฺทาเยยฺย ฯ ยสฺมา จ
โข มหาราช เอวรูเปหิ เอวรูเปหิ มหนฺเตหิ มหนฺเตหิ ปฏิปีฬเนหิ ปฏิปีฬิตํ ตํ
อุทกํ น สทฺทาเยยฺย ตสฺมาปิ สตฺถิ อุทเก ชีโว วา สตฺโต วา วาติ เอวเมตํ
มหาราช ธาเรหีติ ฯ สาธุ ภนฺเต นาคเสน เทสนาคโต ปญฺโห อนุจฺฉวิกาย วิภตฺติยา
วิภตฺโต ฯ ยถา นาม ภนฺเต นาคเสน มหติมหคฺฆํ มณิรตนํ เฉกํ อาจริยํ กุสลํ
สิกฺขิตํ มณิการํ ปาปุณิตวา กิตฺตึ ลเภยฺย โถมนํ ปสํสํ มุตฺตารตนํ วา มุตฺติกํ ทุสฺสรตนํ
วา ทุสฺสิกํ โลหิตจนฺทนํ วา คนฺธิกํ ปาปุณิตฺวา กิตฺตึ ลเภยฺย โถมนํ ปสํสํ เอวเมว
โข ภนฺเต นาคเสน เทสนาคโต ปญฺโห อนุจฺฉวิกาย วิภตฺติยา วิภตฺโต เอวเมตํ
ตถา สมฺปฏิจฺฉามีติ ฯ

อุทกสฺส สตฺตชีวปญฺโห ปญฺจโม ฯ

ภนฺเต นาคเสน ทิสฺสนฺติ โลเก พุทฺธา ทิสฺสนฺติ ปจฺเจกพุทฺธา ทิสฺสนฺติ
ตถาคตสาวกา ทิสฺสนฺติ จกฺกวตฺติราชาโน ทิสฺสนฺติ ปเทสนาชาโน ทิสฺสนฺติ เทวมนุสฺสา
ทิสฺสนฺติ สธนา ทิสฺสนฺติ อธนา ทิสฺสนฺติ สุคตา ทิสฺสนฺติ ทุคฺคตา ทิสฺสติ ปุริสสฺส